Sjúkraliði á dagdeild skurðlækninga A4 Fossvogi

Óskað er eftir metnaðarfullum sjúkraliða í öflugan hóp starfsfólks á dagdeild skurðlækninga A4 í Fossvogi. Við tökum vel á móti nýju starfsfólki og bjóðum upp á aðlögun með reyndu og frábæru starfsfólki. Starfshlutfall og upphaf starfs er eftir samkomulagi.

Dagdeild skurðlækninga heyrir undir skurðlækninga-, skurðstofu- og gjörgæsluþjónustu. Á deildinni starfa um 30 starfsmenn, hjúkrunarfræðingar, sjúkraliðar og annað starfsfólk við fjölbreytt og krefjandi verkefni. Í boði er fjölbreytt, tæknilegt og líflegt starf í sérhæfðu starfsumhverfi þar sem ríkir góður starfsandi og þverfaglegt samstarf. Deildin tekur á móti sjúklingum á öllum aldri (börnum og fullorðnum) sem fara í aðgerðir á Landspítala í Fossvogi, þ.m.t. í háls-, nef- og eyrnalækningum, lýta-, æða-, heila-, tauga- og bæklunarskurðaðgerðir.

Á deildina leggjast inn sjúklingar sem fara í dagaðgerðir ásamt sjúklingum sem þarfnast innlagnar á öðrum legudeildum að aðgerð lokinni. Deildin sinnir einnig sjúklingum fyrir og eftir inngrip á vegum röntgen- og lungnalækna og tekur á móti bráðasjúklingum, t.d. frá bráðamóttöku, öðrum sjúkrahúsum eða að heiman.Opnunartími deildarinnar er frá 07:00 til 22:00 á virkum dögum. Vinnutímaskipulag er tvískipt vaktavinna.

Vinnuvika starfsfólks í fullri vaktavinnu er nú 36 stundir og getur orðið minni eftir samsetningu vakta. Markmiðið er að stuðla að betri heilsu og öryggi starfsfólks og auka möguleika þess til að samþætta betur vinnu og einkalíf.