Sjúkraliði á göngudeild 10E Hringbraut

Við sækjumst eftir kraftmiklum sjúkraliða sem hefur áhuga á spennandi og fjölbreyttri hjúkrun á göngudeild 10E Landspítala við Hringbraut. Á deildinni er veitt fjölbreytt þjónusta á mismunandi sérsviðum. Starfið sem um ræðir er hluti af tveimur teymum, þ.e. kviðarholsskurð- og meltingarteymi. Starfshlutfall er 80-100% eða eftir samkomulagi og er ráðið í starfið sem fyrst eða eftir nánara samkomulagi.

Kviðarholsteymið sinnir sjúklingum fyrir og eftir skurðaðgerðir á kviðarholi, sáraskiptingum, stómaþegum, innskriftum sjúklinga fyrir aðgerðir og einnig eru gerðar minniháttar aðgerðir í staðdeyfingu. Starfið er því afar fjölbreytt og krefjandi og gefur mikla möguleika til starfsþróunar.

Meltingarteymið sinnir sjúklingum með IBD, næringarslöngur/hnappa, skorpulifur og aðra meltingarfærasjúkdóma. Þá er hluti starfseminnar á innrennslismóttöku og einnig við rannsóknir á meltingarfærum.

Á deildinni er markvisst unnið að umbótum og framþróun, en þar starfar öflugur hópur og einkennist vinnuandinn af samvinnu, metnaði og góðum liðsanda.

Vinnuvika starfsfólks í fullri dagvinnu er 36 stundir. Markmiðið er að stuðla að betri heilsu og öryggi starfsfólks og auka möguleika þess til að samþætta betur vinnu og einkalíf.