Umburðarlyndur og lausnamiðaður starfskraftur óskast í viðbragðsteymi

Ert þú að leita þér að gefandi en krefjandi starfi við fjölbreyttar aðstæður? Þá erum við að leita af þér. Norðurmiðstöð óskar eftir hressu og umhyggjusömu starfsfólki til starfa í viðbragðsteymi heimaþjónustu. Um er að ræða hlutastörf á dagvinnutíma og er ráðningartímabil samkomulag.

Starfsfólk óskast til starfa í viðbragðsteymi heimaþjónustu. Um er að ræða hlutastarf í dagvinnu og er ráðningartímabil samkomulag. Starfshlutfall getur verið 40-80% eða eftir samkomulagi. Starfið hentar vel með námi, s.s. á félags-, heilbrigðis- eða menntavísindasviði.

Í teyminu starfar þéttur og samheldinn starfsmannahópur, sem leggur metnað í að aðstoða og styðja fólk við að koma heimili sínu í betra horf. Má þar meðal annars nefna stuðning við skipulagningu, almenn þrif, ásamt losun á sorpi og ónýttum hlutum. Teymið leggur sig fram við að veita persónumiðaða og sveigjanlega þjónustu, sem stuðlar að auknu sjálfstæði og virkri samfélagsþátttöku fólks. Áhersla er lögð á opin og jákvæð samskipti, virðingu og liðsheild.

Starfið býður upp á fjölbreyttar áskoranir. Unnið er á heimilum notenda þar sem mikil þörf er á aðstoð og geta notendur meðal annars átt við geðræn veikindi og/eða fíknivanda að stríða. Mikilvægt er að viðkomandi treysti sér í að sinna verkefnum inni á heimilum við krefjandi aðstæður.

Vakin er athygli á stefnu Reykjavíkurborgar um jafnan hlut kynja í störfum og að vinnustaðir endurspegli það margbreytilega samfélag sem borgin er.