Ráðgjafi/ stuðningsfulltrúi á legudeild geðrofssjúkdóma - afleysing

Legudeild geðrofssjúkdóma leitar eftir jákvæðu og metnaðarfullu samstarfsfólki í tímabundin störf vegna afleysinga í fæðingarorlofi. Starfshlutfall er 80-100% og unnið er í vaktavinnu. Ráðningartími er 4-8 mánuðir og er upphafstími ráðningar í ágúst 2026.

Legudeild geðrofssjúkdóma sinnir greiningu, meðferð og endurhæfingu fólks með geðrofssjúkdóma. Deildin er 16 rúma, 10 rými ætluð einstaklingum með bráð veikindi og 6 rými ætluð til endurhæfingar. Á deildinni er boðið upp á samtalsmeðferð, virknimeðferð, fræðslu, lyfjameðferð og áhersla er lögð á öfluga fjölskylduvinnu. Markmið meðferðarvinnu er að auka lífsgæði og valdefla sjúklinga, draga úr hamlandi geðrofseinkennum og þjálfa upp bjargráð til að lifa með geðrofssjúkdóm.

Starfið felur í sér að veita líkamlega og andlega umönnun og hjúkrun, hvatningu við athafnir daglegs lífs, ferðir í ýmsa virkni og að tryggja öryggi sjúklinga og starfsmanna á deild með þátttöku í varnarteymi geðþjónustu. Áhersla er lögð á fjölbreytni í starfsmannahópnum þar sem leitast er við að nýta þekkingu og færni hvers starfsmanns í deildarstarfið.

Unnið er á þrískiptum vöktum, morgun-, kvöld- og næturvöktum. Vinnuvika starfsfólks í fullri vaktavinnu er 36 stundir og getur orðið minni eftir samsetningu vakta. Markmiðið er að stuðla að betri heilsu og öryggi starfsfólks og auka möguleika þess til að samþætta betur vinnu og einkalíf. Við tökum vel á móti nýju samstarfsfólki og veitum góða einstaklingshæfða aðlögun.