Rekstrarstjóri Félagsvísindasviðs

Laust er til umsóknar fullt starf rekstrarstjóra við Félagsvísindasvið Háskóla Íslands. Starfið heyrir undir forseta Félagsvísindasviðs. Rekstrarstjóri ber ábyrgð á daglegum rekstri og stjórnun á miðlægri skrifstofu sviðsins og stoðþjónustu í nánu samráði við forseta sviðs. Rekstrarstjóri hefur umsjón með og yfirsýn yfir fjármál fræðasviðs, vinnur að bættri nýtingu á fjármunum, hagræðingu og skipulagningu á rekstri. Sem stjórnandi á skrifstofunni ber rekstrarstjóri jafnframt ábyrgð á mannauðsmálum, markaðs- og kynningarmálum, upplýsingatæknimálum og almennri þjónustu við nemendur og starfsfólk.

Helstu verkefni og ábyrgð

Daglegur rekstur og stjórnun skrifstofu sviðsins
Umsjón með og yfirsýn yfir fjármál fræðasviðsins
Stjórnun starfsfólks stoðþjónustu og stjórnsýslu
Yfirumsjón með fjárhagsáætlunum sviðs og þeirra stofnana og deilda sem því tengjast
Ábyrgð á skjalastjórnun og rekstri tækjabúnaðar sviðsins
Miðlun upplýsinga bæði innan fræðasviðs og til miðlægrar stjórnsýslu

Menntunar- og hæfniskröfur

Háskólapróf sem nýtist í starfi, meistarapróf er æskilegt
Reynsla af rekstri og fjárhagsáætlanagerð
Reynsla af opinberum fjármálum og/eða fjárhags- og mannauðskerfi ríkisins Orra er æskileg
Reynsla af stjórnun, þ.á.m. stjórnun fjármála
Reynsla af opinberri stjórnsýslu er kostur
Leiðtogahæfni
Góð kunnátta í íslensku og ensku, bæði í ræðu og riti
Skipulagshæfni og samskiptafærni

Æskilegt er að viðkomandi geti hafið störf sem fyrst.

Eftirfarandi gögn skulu fylgja umsókn:

Ferilskrá
Kynningarbréf þar sem fjallað er um hvernig umsækjandi uppfyllir þær hæfnikröfur sem settar eru fram í auglýsingunni og hvað hann telur sig geta lagt af mörkum til starfsins
Afrit af prófskírteinum
Upplýsingar um umsagnaraðila

Öllum umsóknum verður svarað og umsækjendum tilkynnt um ráðstöfun starfsins þegar ákvörðun hefur verið tekin. Umsóknir geta gilt í sex mánuði frá lokum umsóknafrests.

Við ráðningu í störf í Háskóla Íslands er tekið mið af jafnréttisáætlun skólans. Vakin er athygli á málstefnu Háskóla Íslands.

Háskóli Íslands hefur frá stofnun verið undirstaða atvinnulífs og framfara í íslensku samfélagi. HÍ er jafnframt framsækinn rannsóknarháskóli og virkur þátttakandi í alþjóðlegu vísindasamstarfi.

Háskóli Íslands er stærsti háskóli landsins og býður upp á hátt í 400 námsleiðir í grunn-, meistara- og doktorsstigi. Um 14.000 nemendur stunda nám við skólann, þar af yfir 2.000 alþjóðlegir nemar.

Við Háskóla Íslands starfa yfir 1.800 manns. Skólinn leggur áherslu á að laða til sín fjölbreyttan hóp starfsfólks og stúdenta í alþjóðlegt fræðasamfélag þar sem akademískt frelsi, fagmennska, jafnrétti, fjölbreytileiki og inngilding eru í öndvegi.

Nánar um Háskóla Íslands, fræðasvið hans og deildir

Auglýsing birt13. febrúar 2026

Umsóknarfrestur23. febrúar 2026

Tungumálahæfni