Hjúkrunarfræðingar á nýja réttar- og öryggisgeðdeild

Viltu taka þátt í að byggja upp nýja geðdeild og móta framtíð réttar- og öryggisgeðþjónustu?

Við leitum að metnaðarfullum hjúkrunarfræðingum sem hafa áhuga á geðhjúkrun og vilja taka virkan þátt í uppbyggingu nýrrar réttar- og öryggisgeðdeildar á Kleppi. Hér er spennandi tækifæri til að koma að mótun nýrrar deildar frá grunni, hafa áhrif á starfshætti og taka þátt í þróun sérhæfðrar geðheilbrigðisþjónustu. Við leitum að reynslumiklum sem og nýútskrifuðum hjúkrunarfræðingum og bjóðum upp á starfsþróunarár fyrir alla hjúkrunarfræðinga sem hefja störf í geðþjónustunni.

Um deildina

Um er að ræða nýja 8 rúma legudeild sem mun sinna sérhæfðri meðferð og endurhæfingu einstaklinga með alvarlegan og flókinn geðrænan vanda. Á deildinni verður lögð áhersla á einstaklingsmiðaða og batamiðaða nálgun þar sem meðferð og endurhæfing taka mið af þörfum, styrkleikum og getu hvers og eins. Meginmarkmið þjónustunnar er að styðja einstaklinga til aukinnar sjálfstæðis, bættra lífsgæða og farsællar endurkomu út í samfélagið.

Starfsemin mun byggja á öflugri þverfaglegri teymisvinnu þar sem hjúkrunarfræðingar gegna lykilhlutverki í meðferð, endurhæfingu og daglegum stuðningi við sjúklinga. Sérstök áhersla verður lögð á virka þátttöku sjúklinga í eigin meðferð, góð samskipti og markvisst samstarf við aðstandendur.

Miklar og heildrænar umbætur standa nú yfir í réttar- og öryggisgeðþjónustu Landspítala, bæði hvað varðar húsnæði, skipulag og þróun þjónustunnar. Opnun nýrrar deildar er mikilvægur liður í þeirri uppbyggingu. Hjúkrunarfræðingar sem ráðast til starfa fá tækifæri til að taka virkan þátt í að móta faglega sýn, þróa meðferðarumhverfi, innleiða nýja verkferla og byggja upp sterka liðsheild. Áhersla verður lögð á faglega þróun, þekkingarmiðlun og starfsumhverfi sem einkennist af samvinnu, öryggi og metnaði fyrir góðri þjónustu.

Gert er ráð fyrir að nýja deildin hefji starfsemi um miðjan mars 2027. Ráðningar munu hefjast fyrr til að tryggja starfsfólki markvissan undirbúning, fræðslu og þjálfun áður en starfsemin fer af stað.

Tækifæri til starfsþróunar - kjarninn í okkar starfi

Við bjóðum upp á starfsþróun og tækifæri til faglegrar sérhæfingar:

• Reyndir hjúkrunarfræðingar og fagfólk styðja þig í daglegu starfi og faglegri þróun.

• Sérhæfð fræðsla og þjálfun fyrir réttar- og öryggisgeðþjónustu.

• Boðið upp á sérhæft starfsþróunarár, sérstaklega ætlað nýjum og nýútskrifuðum hjúkrunarfræðingum í geðþjónustunni. Þar fer fram fræðsla, þjálfun og fagleg handleiðsla á starfsstöð.

• Þjálfun fyrir opnun deildar, þar sem allt starfsfólk fær tíma og stuðning til að undirbúa sig vel áður en starfsemi hefst.

• Raunveruleg tækifæri til að byggja upp sérþekkingu og þróast í átt að öflugum leiðtoga í hjúkrun til framtíðar.

• Starfsþróunarár fyrir nýútskrifaða hjúkrunarfræðinga á Landspitala.

Betra jafnvægi vinnu og einkalífs

• Vinnuvika í fullu starfi er 36 stundir, og getur orðið styttri eftir samsetningu vakta.

• Markmiðið er að stuðla að betri heilsu og öryggi starfsfólks og auka möguleika þess til að samþætta vinnu og einkalíf.

Starfskjör og upplýsingar

• Starfshlutfall: 50-100% eða eftir samkomulagi

• Vinnufyrirkomulag: Vaktavinna

• Störfin eru laus frá: 2. janúar 2027 eða eftir samkomulagi

• Gert er ráð fyrir að deildin hefji formlega starfsemi í mars 2027

Langar þig að taka þátt í að skapa eitthvað nýtt, þróast í starfi og hafa raunveruleg áhrif á líf fólks?

Sæktu um og vertu með frá fyrsta degi.