Við Grunnskólann á Hellu stunda um 190 nemendur nám í 1.–10. bekk. Nýbygging skólans verður að fullu tekin í notkun fyrir skólaárið 2026–2027 og verður aðstaða skólans þá eins og best verður á kosið. Á Hellu búa um 1000 manns og stendur Grunnskólinn á Hellu í hjarta þorpsins á einu fegursta bæjarstæði landsins við hina lygnu Ytri-Rangá. Í næsta nágrenni við grunnskólann er leikskólinn Heklukot og Tónlistarskóli Rangæinga, Íþróttamiðstöð með frábærri sundlaug, gervigrasvelli, sparkvelli og leiksvæðum. Á Hellu er margvísleg þjónusta og kraftmikil uppbygging m.a. hvað varðar fjölbreytt íbúðahúsnæði. Þar eru ótal möguleikar til að sinna áhugamálum og útiveru af öllu tagi. Á Hellu er gott mannlíf og þar er tekið vel á móti fólki.