Laus störf Hæfnileit Vinnustaðir Námskeið

Umhverfis-, orku- og loftslagsráðuneytið

Hlutverk umhverfis-, orku- og loftslagsráðuneytisins er að skapa umgjörð um umhverfisvernd og sjálfbæra nýtingu náttúrugæða með velferð og jafnrétti kynslóðanna að leiðarljósi. Verkefni umhverfis-, orku- og loftslagsráðuneytisins varða meðal annars umhverfis- og náttúruvernd, loftslagsmál, orkumál og sjálfbæra nýtingu auðlinda. Ráðherra fer með yfirstjórn ráðuneytisins og ber ábyrgð á öllum stjórnarframkvæmdum þess. Ráðuneytisstjóri stýrir ráðuneytinu undir yfirstjórn ráðherra. Skrifstofur ráðuneytisins eru fjórar samkvæmt skipuriti þess: skrifstofa ráðuneytisstjóra, skrifstofa alþjóðamála, skrifstofa umhverfis og orku og skrifstofa loftslags og náttúru. Innan ráðuneytisins starfa einnig fjögur fagteymi. Fagteymin eru Orkuteymi, Hringrásar- og umhverfisteymi, sem starfa á skrifstofu umhverfis og orku, ásamt Loftslags- og náttúruvárteymi og náttúruverndar og menningarminjateymi, sem starfa innan skrifstofu loftslags og náttúru.

Vinnustaðurinn

Sérfræðingur óskast til starfa

Umhverfis-, orku- og loftslagsráðuneytið leitar að öflugum sérfræðingi með framúrskarandi stafræna færni og gagnalæsi til að vinna að stafrænni þróun, sinna áætlanagerð og framkvæmd fjárlaga.

Helstu verkefni og ábyrgð

Um er að ræða starf í einingunni Fjármál, stafræn þróun og innri þjónusta og heyrir starfið undir rekstrarstjóra ráðuneytisins. Starfið felur í sér mikla gagnavinnu og gagnaþróun sem snýr að fjármálum og áætlanagerð innan málaflokka ráðuneytisins sem og í tengslum við stofnanir þess. Viðkomandi tekur einnig þátt í stafrænni þróun ráðuneytisins með því að þróa góð og gagnvirk gögn sem nýtast við ákvarðanatöku. Sérfræðingurinn kemur að samskiptum við stofnanir og þróun mælikvarða og nýtingu fjármagns innan málaflokka.

Starfið krefst greinagóðrar stafrænnar færni þar sem unnið er með gagnagrunna og leitað gagnvirkra leiða til að safna og miðla upplýsingum. Ráðuneytið leggur ríka áherslu á hagnýtingu gervigreindar og er það eitt af hlutverkum sérfræðingsins að styðja við þá áherslu.

Menntunar- og hæfniskröfur

Háskólanám sem nýtist í starfi (s.s. fjármálaverkfræði, hagfræði, viðskiptafræði)
Mjög góð greiningarfærni og geta til að miðla upplýsingum
Framúrskarandi stafræn færni og geta til að vinna með gögn
Reynsla af fjármálavinnu og áætlanagerð
Mjög góð samskipta- og samvinnufærni
Geta til að starfa í hópi/teymi
Frumkvæði og sjálfstæði í starfi
Rík þjónustulund
Mjög góð enskukunnátta
Góð færni í íslensku í rituðu máli