Öflugur bílstjóri óskast í sendibílavinnu

Góðan daginn.

Ég er að leita að mannskap sem fyrst í nokkuð þægilega og fjölbreytta sendibílavinnu.

Ekki er nauðsynlegt að hafa meirapróf en það er kostur ef viðkomandi hefur það eða hefur áhuga á að taka slíkt próf.

Umsækjendur þurfa að vera þokkalega fit og ég lít á það sem kost ef viðkomandi hefur áhuga á íþróttum/líkamsþjálfun.

Ef menn hafa reynslu af verklegri vinnu t.d. við bílastúss getur það hjálpað. Mögulega reyni ég að ráða einhverja sem eru til í að hjálpa mér að standsetja bíla útlitslega. (ryðhreinsa og mála stuðara og lyftublöð, blettun bón o.s.fr.

Nánar :

Ég rek litla og netta sendibílaþjónustu, hef 4-5 sendibíla/trukka og er með góð föst verkefni fyrir hádegi. ca 5:30-11:30. Eftir hádegi er unnið gegnum sendibílastöð ásamt því að þjónusta smærri fastakúnna.

Leitað er að fit, kurteisum, varkárum og (morgun)hressum bílstjórum. Viðkomandi þarf að geta unnið eftir vaktafyrirkomulagi þ.e.a.s. aðra hvora helgi. Frídagar í miðri viku koma á móti. Fjórðu hverju viku er nóg að menn mæti 8:00. Reyni að hafa vaktafyrirkomulagið manneskjulegt.

Er með bæði minni body bíla/snattara og litla og (meðal)stóra kassabíla og menn þurfa að treysta sér til að keyra hvoru tveggja og flakka stundum milli bíla.

Meiraprófið er æskilegt. (C-réttindi, vörubíll) Til greina kemur þó að ráða mann með venjulegt bílpróf ef reynsla úr umferðinni af akstri er til staðar og hausinn á viðkomandi er í lagi og rétt skrúfaður á ;-). Eins er kostur ef menn hafa einhverja reynslu af akstri í atvinnuskyni.

Laun eru held ég alveg þokkaleg. Greitt er verktakagjald og fasta vinnan er að borga einhversstaðar rétt norðan við 6.000.- kallinn á tímann . Venja og hefð er fyrir því að greiða fyrir þessa vinnu í verktakaformi en mögulegt er að umbreyta yfir í launaseðil ef menn vilja það frekar. Launin heilt yfir reiknast þannig að menn eru að fá akkúrat helming af því sem þeir taka inn á bílana. Einfalt og gott. Því myndi ég segja að þessi vinna henti vel duglegum og sjálfstætt hugsandi mönnum sem skilja og kunna að meta að þeir fá greitt í samræmi við vinnuframlag.

Vinnan gegnum sendibílastöðina er mjög fjölbreytt. Allt frá smærri pökkum og stökum brettum sem þurfa að komast frá a til b (t.d. húsgögn, heimilistæki, sorp o.fl.) yfir í stærri flutninga og einstaka búslóðir. Menn þurfa því eins og ég segi að vera fit og góðir til heilsunnar.

Viðkomandi myndi fá góða þjálfun og vera með mér í bíl a.m.k. fyrstu dagana.

Alltaf er frí aðra hvora helgi.

Ég er nokkuð sveigjanlegur varðandi frítöku en vil þó helst finna menn sem geta haldið sig nokkuð vel við vaktaplan og ég fer fram á að menn biðji um frí með góðum fyrirvara..