Laus störf Hæfnileit Vinnustaðir Námskeið

Umhverfis-, orku- og loftslagsráðuneytið

Hlutverk umhverfis-, orku- og loftslagsráðuneytisins er að skapa umgjörð um umhverfisvernd og sjálfbæra nýtingu náttúrugæða með velferð og jafnrétti kynslóðanna að leiðarljósi. Verkefni umhverfis-, orku- og loftslagsráðuneytisins varða meðal annars umhverfis- og náttúruvernd, loftslagsmál, orkumál og sjálfbæra nýtingu auðlinda. Ráðherra fer með yfirstjórn ráðuneytisins og ber ábyrgð á öllum stjórnarframkvæmdum þess. Ráðuneytisstjóri stýrir ráðuneytinu undir yfirstjórn ráðherra. Skrifstofur ráðuneytisins eru fjórar samkvæmt skipuriti þess: skrifstofa ráðuneytisstjóra, skrifstofa alþjóðamála, skrifstofa umhverfis og orku og skrifstofa loftslags og náttúru. Innan ráðuneytisins starfa einnig fjögur fagteymi. Fagteymin eru Orkuteymi, Hringrásar- og umhverfisteymi, sem starfa á skrifstofu umhverfis og orku, ásamt Loftslags- og náttúruvárteymi og náttúruverndar og menningarminjateymi, sem starfa innan skrifstofu loftslags og náttúru.

Vinnustaðurinn

Ert þú lögfræðingurinn sem við leitum að?

Umhverfis-, orku- og loftslagsráðuneytið leitar að lögfræðingi á sviði loftslagsmála sem hefur brennandi áhuga á að starfa í efstu stjórnsýslu landsins við að móta framtíð loftslagsmála.

Um er að ræða fjölbreytt verkefni í loftslagsmálum í lifandi starfsumhverfi þar sem áhersla er lögð á teymisvinnu og skipulögð vinnubrögð.

Staðan er á skrifstofu loftslagsmála sem hefur það megin markmið að fylgja eftir loftslagsstefnu stjórnvalda. Megin áherslur eru að draga úr losun gróðurhúsalofttegunda og vinna að aðlögun íslensks samfélags að loftslagsbreytingum. Verkefnin snúa að því að halda utan um stefnumótun og löggjöf sem varðar loftslagsmál, aðgerðaáætlun í loftslagsmálum og aðlögunaráætlun vegna loftslagsbreytinga. Þá er útfærsla og framkvæmd alþjóðasamninga á sviði loftslagsmála og Evrópulöggjöf í brennidepli. Auk þess sinnir skrifstofan málefnum vegna loftmengunar, veðurþjónustu, loftslagsþjónustu, og vöktun náttúruvár sem fellur ekki undir starfssvið Ofanflóðanefndar.

Helstu verkefni og ábyrgð

Lögfræðingur á sviði loftslagsmála sinnir afgreiðslu mála á skrifstofunni, stjórnsýslu, alþjóðlegu samstarfi, vinnu að stefnumótun, eftirfylgni og ráðgjöf. Lögfræðingur leiðir og tekur þátt í vinnslu frumvarpa og reglugerða, auk þess að sinna stjórnsýslu sem snýr að lögfræðilegum erindum eða álitamálum, sem og kærum og úrskurðum. Þá tekur lögfræðingurinn þátt í upptöku Evrópuregluverks og skipuleggur innleiðingu þess í íslenskan rétt. Starfið felur einnig í sér samstarf innan ráðuneytisins, við önnur ráðuneyti, stofnanir og ýmsa hagaðila.

Menntunar- og hæfniskröfur

Kandídats- eða meistarapróf í lögfræði
Reynsla á sviði opinberrar stjórnsýslu er kostur
Þekking eða reynsla á sviði EES-samningsins og alþjóðlegu laga og regluverki á sviði loftslagsmála er kostur
Góð stafræn færni
Frumkvæði, skipulögð vinnubrögð og sjálfstæði í starfi
Lausnamiðuð hugsun og geta til vinna undir álagi
Mjög góðir samstarfs- og samskiptahæfileikar og geta til að vinna í teymi.
Mjög gott vald á íslensku og færni til að tjá sig í ræðu og riti
Mjög góð kunnátta í ensku

Laun samkvæmt gildandi kjarasamningi sem fjármála- og efnahagsráðherra og viðkomandi stéttarfélag hafa gert.

Áhugasamir einstaklingar, án tillits til kyns, eru hvattir til að sækja um.

Með umsókn skal fylgja starfsferilskrá, prófskírteini og kynningarbréf þar sem gerð er grein fyrir ástæðum umsóknar og hvernig umsækjandi uppfyllir hæfniskröfur.

Starfshlutfall er 100%

Auglýsing birt27. maí 2026

Umsóknarfrestur1. júní 2026

Tungumálahæfni