Laus störf Hæfnileit Vinnustaðir Námskeið

Blábankinn

Blábankinn tók til starfa árið 2017 og er samstarfsverkefni í byggðaþróun milli einkaaðila, ríkis og sveitarfélags. Markmiðið er að fjölbreyttari þjónusta á Þingeyri, gera opinbera þjónustu aðgengilegri, samskiptin milli íbúa og opinberra stofnana skilvirkari og skapa grundvöll að félags- og efnahagslegri nýsköpun. Blábankinn vinnur að því að efla samfélag sköpunar fyrir þorpið og heiminn, með því að hvetja til starfsemi á staðnum, mynda hæfni og þekkingu, auka fjölda notenda og efla ímynd Blábankans og Þingeyrar.

Vinnustaðurinn

Bankastjóri Blábankans

Viltu leiða suðupott sköpunar í sjávarþorpi á Vestfjörðum?

Blábankinn er ekki fjárhagslegur banki heldur miðstöð sköpunar á Vestfjörðum. Fólk leggur inn hugmyndir í Blábankann og ávaxtar þær – fyrir sjálft sig, samfélagið og heiminn.

Áttu auðvelt með uppbyggjandi samskipti á íslensku og ensku og hefur áhuga á að tengja saman fólk og efla samstarf ólíkra hagaðila?
Kanntu að miðla sögum um fólk sem skapar, frumkvæði, menningu og sjálfbæra lifnaðarhætti?
Sýnir þú frumkvæði, sjálfstæð vinnubrögð og sveigjanleika í starfi ?
Viltu vinna og búa í fallegu þorpi í vexti, í nálægð við einstaka náttúru?

Bankastjóri Blábankans

Bankastjóri er forstöðumaður Blábankans á Þingeyri og ber ábyrgð á daglegum rekstri, þróun verkefna og áframhaldandi uppbyggingu starfseminnar. Starfið felur í sér fjölbreytt verkefni á sviði nýsköpunar, menningar og samfélagsþróunar og er unnið í nánu samstarfi við stjórn Blábankans, Vestfjarðastofu, íbúa, frumkvöðla, listafólk og samstarfsaðila innanlands og erlendis.

Um er að ræða fullt starf með starfsstöð á Þingeyri. Möguleiki á að hluti starfs sé unninn í fjarvinnu.

Við leitum að einstaklingi sem hefur metnað til að byggja áfram á því öfluga starfi sem unnið hefur verið undanfarin ár og þróa starfsemina áfram í takt við framtíðarsýn Blábankans.

Helstu verkefni og ábyrgð

Þróun nýsköpunar- og menningarverkefna.
Gerð umsókna í innlenda og alþjóðlega styrktarsjóði og eftirfylgni verkefna.
Að efla samstarf og tengslanet Blábankans innanlands og erlendis.
Umsjón með samvinnurými (co-working space) og þjónustu við notendur þess.
Umsjón með húsnæði eftir þörfum.
Þjónusta við frumkvöðla, listafólk, íbúa og gesti.
Umsjón með viðburðum og samfélagsverkefnum.
Samskipti við verktaka og verkstjórn eftir þörfum.

Menntunar- og hæfniskröfur

Reynsla af verkefnastjórnun, æskilega fjölþjóðlegra verkefna.
Færni til að skapa og rækta tengsl við ólíka einstaklinga og stofnanir.
Góð íslensku- og enskukunnátta er skilyrði.
Sveigjanleiki, framkvæmdagleði og skipulögð, sjálfstæð vinnubrögð.
Þjónustulund og lausnamiðuð hugsun.
Áhugi á nýsköpun, menningu og samfélag uppbyggingu.

Um Þingeyri

Þingeyri er staðsett í Dýrafirði, einn af fallegustu fjörðum landsins. Á Þingeyri er frábær aðstaða til útivistar, skóli, leikskóli, íþróttamannvirki, félagsheimili og hin margrómaða sundlaug – allt í göngufæri. Þá er stutt í fjöruna, fjöllin og einstaka náttúru Vestfjarða.

Þingeyri er samfélag í vexti. Á síðustu sex árum hefur börnum á skólaaldri fjölgað um 33%, fólki á atvinnualdri um 20% og íbúafjöldi farið vaxandi.

Þorpið er hluti af Ísafjarðarbæ og er þjónustumiðjan Ísafjörður í rúmlega hálftíma akstursfjarlægð. Þingeyri er í rúmlega fjögurra tíma akstursfjarlægð frá Reykjavík og reglulegt flug er frá Ísafirði.

Um Blábankann

Blábankinn tók til starfa árið 2017 sem samstarfsverkefni einkaaðila, ríkis og sveitarfélags. Hann hefur síðan þróast í öfluga samfélags- og sköpunarmiðstöð þar sem nýsköpun, menning og samfélagsþróun fara hönd í hönd.

Blábankinn styður fólk sem vill skapa, þróa hugmyndir, vinna saman og byggja upp líflegt samfélag á Vestfjörðum. Markmið Blábankans er að styðja við fjölbreytta atvinnusköpun í nærumhverfinu og vera hvati, tengiliður og samstarfsvettvangur fyrir verkefni sem stuðla að vexti einstaklinga og samfélags.

Nánari upplýsingar um starfsemina má finna á blabankinn.is.

Æskilegt er að viðkomandi geti hafið störf í lok ágúst 2026.

Nánari upplýsingar um starfið veitir Tinna Ottesen í [email protected].

Öllum umsóknum verður svarað þegar ákvörðun um ráðningu hefur verið tekin. Við hvetjum öll áhugasöm til að sækja um starfið.

Auglýsing birt15. júlí 2026

Umsóknarfrestur15. ágúst 2026

Tungumálahæfni