Vilt þú sjá um samfélagsmiðla KEF?

Við leitum að skapandi og skipulögðum verkefnastjóra í einingu Flugfélaga og markaðsmála til að stýra samfélagsmiðlum Keflavíkurflugvallar og öðrum fjölbreyttum markaðsverkefnum.

Starfið felur meðal annars í sér að móta efnisstefnu og þróa samfélagsmiðla Keflavíkurflugvallar og skipulag þeirra í nánu samstarfi við liðsfélaga innan deildarinnar. Viðkomandi hefur umsjón með hugmyndavinnu, efnisgerð og gerð skilaboða sem birt eru á viðeigandi miðlum hverju sinni með það að markmiði að hámarka árangur markaðsaðgerða og sýnileika KEF í síbreytilegu umhverfi og í takt við tíðarandann hverju sinni. Einnig að taka virkan þátt í fjölbreyttum og skemmtilegum verkefnum markaðsdeildar í samstarfi við samstarfsaðila innan og utan fyrirtækisins.

Viðkomandi þarf að hafa skipulagið á hreinu, sýna frumkvæði í vinnubrögðum og búa yfir góðri samskiptafærni, sem og hafa þekkingu á markaðsmálum.

Helstu verkefni:

• Hugmyndavinna, efnissköpun og birtingar á markaðs- og kynningarefni á viðeigandi miðlum

• Leiða og móta efnisstefnu KEF á stafrænum/ýmsum miðlum

• Textasmíð, ritstjórn og innsetning greina og markpósta

• Uppsetning og upptökur á einföldu kynningarefni

• Aðkoma að viðburðum á vegum fyrirtækisins

• Samskipti við samstarfsaðila s.s. auglýsingastofu, viðburðafyrirtæki, flugfélög, rekstraraðila, verktaka og aðra tengiliði innan fyrirtækisins

• Önnur tilfallandi verkefni

Hæfniskröfur:

• Menntun og/eða reynsla sem nýtist í starfi

• Góð þekking og reynsla af stafrænni markaðssetningu og kynningarstarfi

• Reynsla af verkefna- og/eða viðburðarstjórnun

• Mjög góð íslensku- og enskukunnátta og mikil færni í textagerð

• Skapandi hugsun, frumkvæði og sjálfstæð vinnubrögð

• Jákvæðni og drifkraftur

• Framúrskarandi samskipta- og samstarfshæfni er skilyrði

Hjá KEF leggjum við ríka áherslu á virðingu og heiðarleika í samskiptum. Við gætum þess að viðhalda gleðinni, erum hugrökk, uppbyggileg og tökum ábyrgð á eigin frammistöðu. Fyrirtækið leggur sig fram við að stuðla að heilsu og vellíðan starfsfólks. Í mötuneytum okkar er boðið upp á hollan og góðan mat og allt starfsfólk hefur aðgang að heilsu- og líkamsræktarstöðvum sér að kostnaðarlausu.

Frekari upplýsingar um starfið veitir Grétar Már Garðarsson, forstöðumaður Flugfélaga og markaðsmála, í tölvupósti á netfangið [email protected]

Umsóknum skal fylgja ferilskrá ásamt kynningarbréfi með rökstuðningi um hæfni viðkomandi í starfið. Við hvetjum áhugasama aðila til að sækja um óháð kyni og uppruna.