Félagsmiðstöðvarnar í Kópavogi eru níu talsins og eru þær staðsettar í hverjum grunnskóla í Kópavogi. Í félagsmiðstöðunum er boðið upp á uppbyggilegt félagsstarf fyrir 10-16 ára börn og unglinga. Áhersla er lögð á að ná til þeirra unglinga sem þarfnast félagalegs stuðnings og að bjóða upp á fjölbreytta dagskrá. Kópavogsbær er barnvænt sveitarfélag. Félagsmiðstöðvar Kópavogs hafa greinar barnasáttmálans að leiðarljósi í öllu sínu starfi, og vinna markvisst að því að uppfylla réttindi barna og ungmenni. Starf á vegum félagsmiðstöðva er í eðli sínu forvarnarstarf þar sem unnið er með viðhof og atferli unglinga í átt til heilbrigðs lífstíls og virkni í samfélaginu. Félagsmiðstöðvastarfinu er jafnframt ætlað að styðja við félagsfærni, sjálfseflingu, sköpun og heilbrigði. Í félagsmiðstöðvastarfi er einnig lögð áhersla á forvarnir gegn óæskilegri hegðun en í þeim reglum sem gilda í starfi félagsmiðstöðva er t.d. skýr afstaða tekin gegn allri vímuefnaneyslu og annarri neikvæðri/óæskilegri hegðun. Unnið er í klúbbum, sértæku hópastarfi, opnu starfi og tímabundnum verkefnum. Auk þess standa félagsmiðstöðvarnar fyrir fjölbreyttum sameiginlegum viðburðum eins og dansleikjum, rafíþróttamótum, íþróttaleikum, söng-og danskeppni, hönnunarsamkeppni og stuttmyndahátíð.