Umhverfis- og skipulagssvið Reykjavíkurborgar

Starfsfólk umhverfis- og skipulagssviðs vill auka lífsgæði í Reykjavík með framúrskarandi þjónustu og metnaði fyrir enn betri borg. Áhersla er á að gera vinnuumhverfi starfsfólks aðlaðandi, öruggt og skilvirkt. Gildi sviðsins eru virðing fyrir umhverfinu, fagmennska í hverju verki og þjónusta við umhverfið.

Vinnustaðurinn

Deildarstjóri byggingarmála

Umhverfis- og skipulagssvið Reykjavíkur leitar að öflugum leiðtoga í nýtt starf deildarstjóra byggingarmála Reykjavíkurborgar.

Deild byggingarmála ber ábyrgð á að byggingarreglugerð og öðrum lögum og reglugerðum um byggingarmál fjalla sé framfylgt. Þá annast deildin útgáfu byggingarleyfa fyrir mannvirki sem staðsett eru í Reykjavík, auk þess að veita markvissa þjónustu og hefur virkt eftirlit með að kröfur um öryggi, útlit, endingu og hagkvæmni mannvirkja sé í samræmi við lög, reglugerðir, skipulagsáætlanir og gildandi stefnur og staðla.

Við leitum að einstaklingi með ríka forystu- og samskiptahæfileika, frumkvæði og þjónustumiðaða hugsun, sem hefur áhuga á nýsköpun og vilja til að taka þátt í leiðandi hlutverki á sviði byggingarmála í Reykjavík.

Um er að ræða fjölbreytt og krefjandi starf í faglegu starfsumhverfi þar sem áhersla er á þverfaglega teymisvinnu, góða þjónustu og virðingu fyrir umhverfinu. Næsti yfirmaður er skrifstofustjóri skipulags-og byggingarmála.

Helstu verkefni og ábyrgð

Ábyrgð á faglegu starfi, uppbyggingu og skipulagi deildar og að málsmeðferð og áherslur verkefna séu í samræmi við stefnu borgaryfirvalda í umhverfis- og skipulagsmálum.
Þátttaka í stefnumótun og áætlanagerð skrifstofu skipulags og byggingarmála.
Forsvar fyrir þjónustu, fagleg stjórnun mannauðs, fjármála, skipulags og daglegra verkefna auk ábyrgðar á rekstri.
Leiðandi hlutverk við þróun verkefnamiðaðrar teymisvinnu.
Leiðir áætlanagerð, skipulagningu og markmiðasetningu einingarinnar og tryggir að unnið sé í samræmi við stefnu, áherslur og markmið umhverfis- og skipulagssviðs.
Samskipti og samráð við íbúa, hagsmunaaðila, ráðgjafa og stofnanir, nefndir og ráð, skrifstofur og deildir innan og utan borgarkerfis.
Yfirumsjón með forgangsröðun verkefna og samræmingu innan deildar.

Menntunar- og hæfniskröfur

Háskólapróf í arkitektúr, byggingarfræði, verkfræði, tæknifræði eða sambærilegum tæknigreinum. Viðeigandi löggilding sérfræðinga í tæknigreinum áskilin.
Framhaldsmenntun í fagi er áskilin.
Viðbótamenntun á sviði stjórnunar, verkefnastjórnunar og/eða opinberrar stjórnsýslu kostur.
Víðtæk reynsla af sambærilegu starfssviði.
Mjög góðir hæfileikar til samskipta og samvinnu.
Hæfni til að skapa öfluga liðsheild.
Greiningar- og skipulagshæfni. Áhugi á breytingum og bættri þjónustu.
Reynsla af stjórnun og áætlanagerð ásamt þekkingu á opinberri stjórnsýslu kostur.
Þekking á skipulags- og byggingarlögum og viðkomandi reglugerðum.
Góð tölvu- og tæknikunnátta og umbótamiðuð hugsun varðandi tæknilausnir.
Íslenskukunnátta C1-C2 skv. samevrópskum tungumálaramma og enskukunnátta B2-C1.

Nánar um starfið
Á umhverfis- og skipulagssviði er unnið að fjölbreyttum verkefnum sem auðga mannlífið í borginni. Leiðarljós sviðsins eru aukin lífsgæði í Reykjavík með framúrskarandi þjónustu og metnaði fyrir enn betri borg og þar gegnir starfsfólkið lykilhlutverki með einstakri fagþekkingu í þeim málaflokkum sem sviðið sinnir.

Um er að ræða 100% starf og æskilegt er að starfsmaður geti hafið störf sem fyrst. Launakjör eru samkvæmt kjarasamningi Reykjavíkurborgar og hlutaðeigandi kjarafélags.

Umsækjendur skulu senda inn ferilskrá (hámark 2 bls.) ásamt kynningarbréfi (hámark 1 bls.), bæði á íslensku. Þar skal gera grein fyrir þeirri þekkingu, reynslu og hæfni umsækjanda sem nýtist til að sinna starfinu í samræmi við hæfniskröfurnar í auglýsingunni. Við ákvörðun um boðun í starfsviðtal verður horft til gæða umsóknargagna.

Gert er ráð fyrir að viðtöl fari fram í viku 23 og 24. Umsækjendum sem komast lengra áfram í ráðningarferlinu verður gert að leysa verkefni. Auk annarra hæfnisþátta koma verkefnin heildstætt inn í mat á hæfni umsækjenda til að sinna starfinu. Við ákvörðun um ráðningu verður, auk framangreindra hæfnisviðmiða, tekið mið af frammistöðu í starfsviðtali og umsagna sem aflað er.

Umsóknarfrestur er til og með 9. júní 2025

Um er að ræða 100% starf. Launakjör eru samkvæmt kjarasamningi Reykjavíkurborgar og hlutaðeigandi kjarafélags.

Umsjón með starfsumsókninni hafa Auður Bjarnadóttir, [email protected] og Garðar Óli Ágústsson, [email protected] hjá Vinnvinn.

Vakin er athygli á stefnu Reykjavíkurborgar um jafnan hlut kynja og að vinnustaðir borgarinnar endurspegli það margbreytilega samfélag sem borgin er.