Aðstoðarleikskólastjóri

Austurkór er 6 deilda leikskóli í Kópavogi þar sem dvelja um 120 börn á aldrinum 1–6 ára. Austurkór er lifandi leikskóli í stöðugri þróun þar sem skólanámskráin okkar er flæðandi. Hún er síbreytileg og tekur mið af því fólki sem er í skólanum hverju sinni, hæfni þeirra og reynslu.

Í Austurkór horfum við á börnin sem hæfileikaríka einstaklinga og viljum vinna með styrkleika þeirra á margvíslegan og fjölbreyttan hátt. Við lítum á að börn séu í eðli sínu skapandi og að skólastarfið eigi að veita fjölbreytt tækifæri til sköpunar með margvíslegum efnivið. Austurkór er lærdómssamfélag þar sem hver einstaklingur innan samfélagsins er mikilvægur og því þýðingarmikið að rödd hvers og eins heyrist. Þessi samfélagssýn endurspeglast í merki skólans sem er hús byggt úr púslum. Hvert okkar er eitt púsl í heildarmynd Austurkór.

Skólastarfið í Austurkór er unnið í samræmi við Aðalnámskrá leikskóla og byggir á félagslegri hugsmíðahyggju. Við horfum til kenninga Vygotskys um nám og þroska barna og þeirrar hugmyndafræði sem birtist í skólastarfi Reggio Emilia.

Við óskum eftir öflugum aðstoðarleikskólastjóra sem brennur fyrir faglegri forystu, góðum starfsanda og metnaðarfullri skólaþróun. Aðstoðarleikskólastjóri tekur virkan þátt í daglegri stjórnun og rekstri leikskólans. Lykilhlutverk er að leiða og styðja faglegt starf, efla starfsfólk og tryggja farsæld barna. Aðstoðarleikskólastjóri vinnur náið með leikskólastjóra að daglegri stjórnun og skipulagningu skólastarfsins og tryggir að starfið sé í samræmi við aðalnámskrá, skólanámskrá og verklagsáætlanir skólans. Aðstoðarleikskólastjóri starfar samkvæmt lögum og reglugerð um leikskóla, öðrum lögum er við eiga, aðalnámskrá leikskóla, kjarasamningum, mannauðs- og skólastefnu Kópavogsbæjar.

Einkunnarorð Austurkórs eru samvinna, lýðræði og atorka.

Heimasíðan okkar er: https://austurkor.kopavogur.is/