Forstjóri Sjúkrahússins á Akureyri
Heilbrigðisráðuneytið auglýsir laust til umsóknar embætti forstjóra Sjúkrahússins á Akureyri (SAk). Heilbrigðisráðherra skipar í stöðuna til 5 ára frá 1. júní 2026.
Sjúkrahúsið á Akureyri starfar samkvæmt lögum um heilbrigðisþjónustu nr. 40/2007. Sjúkrahúsið á Akureyri er kennslusjúkrahús og þekkingarstofnun sem veitir sérfræðiþjónustu í helstu greinum læknisfræði og hjúkrunarfræði sem og almenna sjúkrahúsþjónustu í sínu umdæmi. Þá annast sjúkrahúsið starfsnám í heilbrigðisvísindagreinum og starfar í nánum tengslum við skóla á sviði menntunar heilbrigðisstétta og rannsókna í heilbrigðisvísindum. Sjúkrahúsið á Akureyri er annað stærsta sjúkrahús landsins og lögum samkvæmt varasjúkrahús Landspítala. Að jafnaði eru tæplega 700 manns starfandi á SAk.
Forstjóri ber ábyrgð á að Sjúkrahúsið á Akureyri starfi í samræmi við lög, stjórnvaldsfyrirmæli og erindisbréf sem ráðherra setur honum. Forstjóri ber ábyrgð á starfsemi og þjónustu stofnunarinnar, að rekstrarútgjöld og rekstrarafkoma sé í samræmi við lög um opinber fjármál nr. 123/2015 og að fjármunir séu nýttir á árangursríkan hátt.
Lögum samkvæmt skal forstjóri hafa háskólamenntun og/eða reynslu af rekstri og stjórnun sem nýtist í starfi.
- Háskólamenntun á framhaldsstigi sem nýtist í starfi er skilyrði.
- Hæfni í mannlegum samskiptum ásamt leiðtogahæfileikum er skilyrði.
- Þekking og reynsla af stjórnun á rekstri í heilbrigðisþjónustu er mikilvæg.
- Þekking og reynsla af áætlunargerð og fjármálum hins opinbera er æskileg.
- Farsæl reynsla af stjórnun mannauðsmála er kostur.
- Reynsla af stefnumótun í heilbrigðisþjónustu er kostur.
- Þekking og reynsla á sviði opinberrar stjórnsýslu er kostur
- Frumkvæði og sjálfstæði í vinnubrögðum.
- Skýr framtíðarsýn fyrir starfsemi sjúkrahússins og heilbrigðiskerfið.
- Gott vald á íslensku og færni til að tjá sig í ræðu og riti.
Íslenska
