Skólameistari Fjölbrautaskóla Norðurlands vestra
Mennta- og barnamálaráðuneytið auglýsir embætti skólameistara Fjölbrautaskóla Norðurlands vestra laust til umsóknar. Fjölbrautaskóli Norðurlands vestra er opinber framhaldsskóli sem var stofnaður árið 1979. Skólinn býður upp á bæði iðn- og tækninám ásamt hefðbundnu bóknámi á stúdentsprófsbrautum. Boðið er upp á nám á starfsbraut og almennri braut við skólann. Heimavist er við skólann og rekur hann að auki dreifnámsdeildir á Hólmavík, Hvammstanga og Blönduósi. Fjölbreytt fjarnám er í boði við skólann ásamt helgarnámi í iðn- og tæknigreinum. Starfsmenn skólans eru 73 og fjöldi nemenda er um 660.
Skólameistari er faglegur leiðtogi í mótun skólastarfs á grundvelli laga og aðalnámskrár framhaldsskóla. Skólameistari veitir skólanum forstöðu. Hann stjórnar daglegum rekstri og starfi skólans og gætir þess að skólastarfið sé í samræmi við lög, reglugerðir, aðalnámskrá og önnur gildandi fyrirmæli á hverjum tíma. Hann ber ábyrgð á gerð fjárhagsáætlunar og að henni sé fylgt og hefur frumkvæði að gerð skólanámskrár og umbótastarfi innan skólans.
Umsækjendur skulu hafa starfsheitið kennari, búa yfir hæfni sem stjórnandi og hafa viðbótarmenntun í stjórnun eða reynslu sem veitir sérhæfða hæfni sem snýr að skólaþróun, stjórnun, rekstri og stjórnsýslu.
Nánar tiltekið er leitað að umsækjendum sem hafa:
-
Umfangsmikla stjórnunarreynslu og leiðtogahæfni.
-
Reynslu af stefnumótunarvinnu og hæfileika til nýsköpunar og að stýra breytingum.
-
Þekkingu og/eða reynslu af opinberri stjórnsýslu, fjármálum, rekstri og áætlanagerð.
-
Skýra framtíðarsýn á tækifæri og áskoranir í skólastarfi á framhaldsskólastigi.
-
Framúrskarandi samskiptahæfni og færni í að skapa liðsheild á vinnustað er nauðsynleg.
Icelandic
