Reiknistofa lífeyrissjóða hf. (RL) er traust félag í eigu 10 lífeyrissjóða og Greiðslustofu lífeyrissjóða. Á meðal eigenda eru til dæmis lífeyrissjóðirnir Gildi, Birta og Stapi. RL er eigandi hugbúnaðarkerfisins Jóakim. Þróun, rekstri og þjónustu vegna kerfisins er sinnt af RL. Viðskiptavinir RL eru aðallega lífeyrissjóðir, stéttarfélög og fjármálafyrirtæki. Starfsmenn félagsins eru 10 talsins í dag. Helsta hlutverk RL er að styðja við kjarnastarfsemi lífeyrissjóða, með því að starfrækja trausta innviði, veita vandaða þjónustu og auka árangur viðskiptavina. Hugbúnaðarkerfið Jóakim þjónar helstu þörfum lífeyrissjóða, stéttarfélaga og fleiri aðila. Kerfið skiptist niður í afmarkaðri kerfiseiningar og má þar helst nefna Iðgjaldakerfið, Verðbréfakerfið, Lífeyrisgreiðslukerfið og Félagakerfið. Kerfið hefur verið í stöðugri þróun, bæði í takt við kröfur viðskiptavina svo og til að uppfylla ítrustu kröfur laga og reglugerða. Starfsemi lífeyrissjóða hefur vaxið hratt undanfarin ár og um leið hafa þarfir og kröfur um sterkari tæknilega innviði og stafræna þróun aukist samfara því. RL býður því upp á starfsumhverfi þar sem reynir á vilja til þróunar og vaxtar án þess að slakað sé á kröfum um gæði og öryggi í rekstri.