Verkefnastjóri í áhættustýringu

Íslandsbanki leitar að kraftmiklum og metnaðarfullum liðsfélaga til að leiða stærri verkefni í Áhættu­stýringu bankans. Verkefnin sem um ræðir eru fjölbreytt, flókin og krefjandi og fela í sér samstarf við stóran hóp starfsfólks, bæði innan Áhættustýringar sem og á öðrum sviðum bankans, ásamt samskiptum og samvinnu við ytri eftirlitsaðila.

Áhættustýring er svið innan Íslandsbanka sem stuðlar að upplýstri ákvarðanatöku og sterkri áhættu­vitund stjórnar og starfsmanna bankans. Hlutverk sviðsins er að sjá til þess að fram fari mæling, mat og skýrslugjöf um áhættu í starfsemi bankans þannig að stjórn, stjórnendur og eftirlitsaðilar hafi á hverjum tíma fullnægjandi yfirsýn yfir starfsemina. Áhættustýring hefur eftirlit með framkvæmd áhættu­stýringar, veitir ráðgjöf til að stuðla að góðri áhættumenningu og tekur virkan þátt í mótun áhættu­stefnu bankans. Þannig styður sviðið við vegferð bankans að vera hreyfiafl til góðra verka.

Starfið tilheyrir deildinni Mat og líkön innan Áhættustýringar sem hefur það hlutverk að tryggja áreiðanlegt mat á öllum áhættuþáttum í rekstri bankans og beitir til þess áhættulíkönum sem deildin sér um að þróa og viðhalda. Deildin miðlar heildaryfirsýn um áhættu til stjórnenda og eftirlitsaðila og sinnir einnig sérhæfðum greiningarverkefnum fyrir aðrar einingar bankans þar sem markmiðið er að umbreyta gögnum í skiljanlegar og gagnlegar upplýsingar sem nýtast við áhættustýringu.